යොවුන් ඔලිම්පික් රන් පදක්කමක් අම්බලන්ගොඩට

යොවුන් ඔලිම්පික් තරගාවලියේ බැඩ්මින්ටන් කණ්ඩායම් ඉසව්වේ රන් පදක්කම දිනා ගැනීමට ශ්‍රී ලංකාව නියෝජනය කළ හසිනි අම්බලන්ගොඩ ක්‍රීඩිකාව ක්‍රීඩා කළ ඇල්ෆා කණ්ඩායම සමත්වී තිබෙනවා. ආජන්ටිනාවේ මේ දිනවල පැවැත්වෙන යොවුන් ඔලිම්පික් තරගාවලියේ බැඩ්මින්ටන් ඉසව්ව නියෝජනය කරමින් ශ්‍රී ලංකාවෙන් සුදුසුකම් ලබා ගත්තේ හසිනි අම්බලන්ගොඩ ක්‍රීඩිකාව පමණයි. එලෙසම බොහෝ රටවල් නියෝජනය කරමින් තරගාවලියට සුදුසුකම් ලබා සිටියේ එක් ක්‍රීඩිකාවක් පමණයි. 

මේ හේතුවෙන් එම ක්‍රීඩිකාවන් එක්කර බැඩ්මින්ටන් කණ්ඩායම් තරග වටයට ස්වාධීන කණ්ඩායම් 08 ක් නම්කර තිබුණා. යොවුන් ඔලිම්පික් ක්‍රීඩා උළෙලකදී ශ්‍රී ලංකාවට පදක්කමක් හිමිවූ පළමු අවස්ථාව ලෙසයි මෙය ඉතිහාසයට එක්වන්නේ. තරගාවලිය ලබන 18 වැනිදා දක්වා ආජන්ටිනාවේදී පැවැත්වීමට නියමිතයි.